مبتدئ .. استفسارات

[jaguar]

مرحبا جماعة كيف الحال عساكم مرتاحين

جماعة انا ودي اخذ لي طراد وف نفس الوقت ودي اطلع عليه قول صيد .. طبعا بشتري القول .. عساس اشغل عليه عمال

عموما انا مبتدئ ومعلوماتي قليله

حاب انكم تفيدوني اكثر لو فيه مجال

شو الفرق بين الشفت القصير والطويل وشو الافضل
والدوران العكسي
وهل 27 قدم مناسب لغرض الصيد وكم السعر التقريبي
وشو اسعار المكاين 75 نظاف

وهل تأيدون طلعات البحر بغرض التجارة (القصد هل هي فعلا تجارة مجدية؟)
واذا عندكم اي شي حابين تفيدوني فيه بكون ممتن لكم

[أسماك الامارات]

السلام عليكم ورحمة الله وبركاته
مرحبا بالملايين
الله يعافيك ويطول بعمر





جماعة انا ودي اخذ لي طراد وف نفس الوقت ودي اطلع عليه قول صيد .. طبعا بشتري القول .. عساس اشغل عليه عمال

عموما انا مبتدئ ومعلوماتي قليله

حاب انكم تفيدوني اكثر لو فيه مجال

شو الفرق بين الشفت القصير والطويل وشو الافضل
والدوران العكسي

الشفت القصير إستخداماته اكثر في أماكن إلي ما فيها غزر (( رقوق ))مثلا عندك بحر بوظبي وهذا بعد يعتمد على أماكن طلعاتك البحرية إلي أنت بتسير لها يعني وما فيها شيء بعد إذا بتستخدمه في الغزر وطبعا سعر أقل من شفت الطويل على حسب علمي من آخر سؤال لي في وكاله الياماها والميركوري و السوزوكي.

الشفت الطويل عكس الشفت القصير ولكن ما يشترونه وايد .

الدواران عكسي أسرع من دوران في إتجاه واحد هذا على حسب علمي





وهل 27 قدم مناسب لغرض الصيد وكم السعر التقريبي
وشو اسعار المكاين 75 نظاف
طراد حجم 27 قدم مناسب للصيد ولكن خبرنا انت من أي دولة حتى نقدر نفيدك اكثر والشباب بعد ما بقصرون.

أخوي انت من وين؟

هل انت من الإمارات ومن أي إمارة؟
على اساس نقدر نفيدك أكثر لأنه عندنا في بعض الإمارات ممنوع الصيد بالقراقير وألياخ من الطراد في بعض المناطق .... المهم خبرنا من و انت إن شاء الله الأعضاء والمشرفين ما بقصرون معاك.

إذا انت من احد دول في الخليج بعد بقولك إن شاء الله أخونا الأعضاء الخليجين ما بقصرون معاك و بخبرونك شو الأفضل.

أسعار المكاين؟

أولا هل أنت تبى تركب مكاين75 حصان حق طراد 27 قدم او لطراد ثاني أصغر من 27 قدم ؟

وهل المكاين إلي تباهن 2 ستروك او 4 ستروك؟

لأنه الطراد 27 قدم المكاين المناسبه له هو 115 حصان.





وهل تأيدون طلعات البحر بغرض التجارة (القصد هل هي فعلا تجارة مجدية؟)
واذا عندكم اي شي حابين تفيدوني فيه بكون ممتن لكم

هذا يااخوي يعتمد على وقتك الخاص وتفكيرك ومدام بتأخذ قول صيد توكل على تجارة بحرية صيد سمج .

إلي أقدر أفيدك فيه هو؟؟؟؟؟؟؟؟؟بس خبرنا من أي دولة وعقب بنعطيك الجواب.


بومحمد.

[jaguar]

تسلم عزيزي على الرد السريع

وعموما انا من راس الخيمة

وبالنسبة للمكاين . سألت احد وقالي اركب مكينتين 75
لكن انتوا ادرى دام 115 شوركم وهداية الله

اشكر تواصلك عزيزي وماعليك قصور

[أسماك الامارات]

هلا اخويjaguar

اها إتقول من راس الخيمة إذا انت من الرمس فا أهل الرمس يستخدمون القراقير أكثر والقليل يستخدمون ألياخ ولكن أنا أقول لوتشوفلك طراد أكبر أحسن حق القراقير يعني لغاية 33 قدم ولكن تقدر تستخدم 27 قدم لأنه أوفر أكثر , وترتب الموضوع حق القراقير (( وقت إستخراج القرقور من البحر ))

وإذا انت من الشعم او غليلة أوخور خوير عليك بألياخ والطراد 27 قدم بعد مناسب وطبعا هذا إذا انت تبى تكون تجاري بحت.

مكاين 75 إقتصادي بشكل كبير وبشل طراد 27 قدم بسهوله إذا غير محمل سمج.
ولكن لا تنسى إذا خذيت حموله من السمج وانت في البحر فا بتكون السرعة بطيئة جدا عندك وضغط على المكاين أنا أشوف 115 من مكاين 2 ستروك أوفرلك.

بومحمد.

[بو سالم المهيري]

بو محمد ما قصر وياك

لو عندي خبره جان خبرتك

والسموحه

[المحيربي]

مالله عليك يا محمد ماخليت شيء حقنا انقوله وتسلم وماعندي كلام الكلام خذاه موديرنا

[jaguar]

يزاكم الله كل خير جماعة على الاهتمام والمعلومات الوافية
بس بالنسبة للنوخذا لو بغيت احطي واحد

شو هي الاجراءات
وكم تقريبا راتب النوخذا ورواتب العمال

والسموحة من الجميع

[أسماك الامارات]

يزاكم الله كل خير جماعة على الاهتمام والمعلومات الوافية
بس بالنسبة للنوخذا لو بغيت احطي واحد

شو هي الاجراءات
وكم تقريبا راتب النوخذا ورواتب العمال

والسموحة من الجميع


هلا أخوي جاكوار

اولا إسمحلي ع التأخير بالرد لأني كنت مشغول.

ما شيء راتب ثابت للعمال او النوخذة رواتبهم على حسب صيد السمك.

بخصوص النوخذه تقسمها بشكل قلاطة

اقلاطة هي مدخول من البيع السمك كلها.
تقسيمها بينك وبين العمال والنوخذة والعدة.

طبعا كل القلاطة تقسمها إلي 2 اولا واحد حق الطراد وعدة البحر كلها.
الثاني يكون تقسيم من بينكم( النوخذة والعمال والمالك ))

او إنك تتفق مع النوخذة على كل طلعة والطلعة من 200 درهم إلى 350 درهم ويعتمد بعد على حسب الإمارة.

إذا بالنج بكون الإتفاق لمدة أربع أيام 1400 درهم وبعد يعتمد على حسب الإمارة.

بومحمد

[المهيري]

http://www.uaefishes.net/up/pic.php?u=109yco7&i=86 (http://www.uaefishes.net/up/pic.php?u=109yco7&i=86)



بومحمد أنت شو تشتغل بالضبط؟؟؟؟؟؟؟؟؟ظ


ماشالله على معلوماتك بنك لووووووووووووووووول



http://www.uaefishes.net/up/pic.php?u=109yco7&i=87 (http://www.uaefishes.net/up/pic.php?u=109yco7&i=87)

[الغدير]

شو الفرق بين الشفت القصير والطويل وشو الافضل


خوي الفرق بين الشفت الطويل و القصير مثل ما تفضل الأخ بو محمد و ما شاء الله عليه, و أيضا إضافة بسيطة
طول الشفت يعتمد على رقعة الطراد( مكان تركيب المكاين) فإذا كانت المسافة من البيص(أسفل القارب فالمؤخرة فالمنتصف) لين الرقعة طويلة يلزم شفت طويل و حتى لو كان الغاطس من الطراد مسافة قصيرة و العكس صحيح. و إذا الشفت قصير و الرقعة طويلة يحصل شي إسمه التجويف (cavitation) فأهم شيئ تحسب هالمسافة و تشوف عالمحرك و المسافة المسموحة (بين الجير و البيص) ما تكون أكثر من 1 بوصة.
http://www.onlineoutboards.com/article_outboard_shaft_length.html


والدوران العكسي

خوي لكل جسم يتحرك أو يدور,تكون في قوة حركة أو دوران معاكسة و بنفس القوة و معروف في علم الفيزياء. فلما المروحة تدور الطراد يأخذ ميلان في جه و تشوف الطراد يأخذ مسار منعطف و لو شيئ بسيط و يعتمد على نوع الطراد و مواصفاته. فلما تكون مكينتين القوة تكون مضاعفة 1+1=2 ولكن لما يكون الدوران عكسي يمكن التخلص من قوة المروحة لإنعطاف الطراد TORQUE عن طريق جعل كل مروحة تدور عكس الأخرى وبما أن المكينتين نفس القوة ففرق القوتين 1-1=0 و الطراد يكون ثابت و السرعة تكون أكثر لأن تأثير القوة على الطراد يكون معدوم
مثال: إقعد فالسيارة و دوس الريس بسرعة و شيل ريلك عن الريس بتشوف إن السيارة تتحرك في جة معاكسة

إن شاء الله أكون وضحت و يسمحوا لي الأعضاء

[أسماك الامارات]

مشكور اخوي الغدير
والله يعطيك العافية ع الإضافة وبصراحة انا إستفدت اكثر بعد من ردك.

إلى الأمام اخوي الغدير.
بومحمد.

[الغدير]

مشكور اخوي الغدير
والله يعطيك العافية ع الإضافة وبصراحة انا إستفدت اكثر بعد من ردك.

إلى الأمام اخوي الغدير.
بومحمد.

مشكور أخوي بو محمد
ومنكم نستفيد

[سلمان]

استفدنا من نواخذتنا الغدير وبومحمد يعطيكم العافيه

[duosrl]

موفق بإذن الله ... لك مني أجمل تحية .