كيف اصيد الهوامير

[محمد الزعابي]

بسم الله الرحمن الرحيم

مرحبا

كيف الحال

هذا اول موضوع لي في هاي الفرضه وان شاء الله استفيد وتستفيدون مني

المهم انا اطلع بحر والحمد لله طايح على بقعه فيها من كل شيء

والبقعه هاي فيها هوامير احجام طيبه اكس ال واكس اكس ال

وموضوعي كيف اصيد الهوامير ال اكس اكس ال

كم يفضل رقم الخيط انا استخدم رقم 90 والميدرا 9 ومرات 8

واذا بسوي خيط 90 وميدرا 6 وسمجه حيه لازم احط بلد (وزن) ولا لا

مع العلم العمق تقريبا 20 متر او اكثر

والسموحه منكم

[ابوشمسة]

مرحبا بك اخوي محمد الزعابي
والله يبارك لك في البقعة اللي توصفها واتمنى لك التوفيق
بما ان المكان فيها احجام كبيرة انا اشوف ميدار رقم 9 مع خيط حجم90 لايتناسبان
لان الخيط حجمه كبير والميدار رقم 9يعتبر صغير
وبالنسبة للهوامير الكبيرة مرة استخدم خيط 90او 100والميدار4-5-6
وطبعا حط بلد حسب الماية وسمجة حية ويفضل الجش واذا كان قوع هوامير حط اي سمكة
سواء حية اوميتة او اي نوع ماراح تتاخر طبعا الميدار اول الخيط وخل مسافةتقريبا متر الى متر ونص
وعقب ركب البلد بطريقة الركة علاق ولاتنسى الصور اخوي محمد وبالتوفيق ان شاء الله

[أسماك الامارات]

ما قصر بوشمسة معاك في الرد
وكلامه صحيح وإستخدم محياه للهوامير حتى الشعري الصغير يضرب عليه الهامور

وننتظر منك صور الطلعة و مالك عذر ألحين
بومحمد

[محمد الزعابي]

مشكوورين اخواني ماقصرتو

وان شاء الله من اطلع البحر بصوركم بالتفصيل الممل بس خلي الجو اشوي يهدى

والسموحه منكم

[الربان عبيدا]

ما قصرو ا وياك الشباب يالزعابي ,بس لاتنسى الصور ,,ربي يحفظك ...
تحياتي لك الغالى.....

[الغدير]

ما شاء الله ما قصروا الشباب الطيبين وفوا و كفوا

و لا نتسى الصور و تقرير الصيد

أتمنى لك التوفيق

تحياتي

[سردال الامارات]

حجم السمجه المستخدمه للهوامير يلعب دور في حجم صيد الهوامير . بس مب دايما . بس الأغلب

يعني استخدمة جشه صغيره أصغر من الكف بشوي بتصيد هوامير صغار وممكن متوسط

أما لو استخدمة جشه كبيره بحجم الكف او اكبر بشوي بتصيد هوامير متوسطه وكبيره

وهذا الكلام يتجربه من زمان بس بشرط المكان يكون فيه هوامير من الصغير الى الكبير وشوف

وبتوفيق

[بو محمد الزوول]

ماقصر بوشمسه والنواخذه وياك وصراحه انا بعد استفدت وااايد من الردود وبجرب انشالله وبنوافيكم بالنتائج