استفسار عن المنشله ( الخيه & المد )

[يتيم الحب]

السلام عليكم


شحالكم
؟؟



شو الصيد معاكم هالايام ان شاء الله بخير ؟


حبيت اسفسر عن المنشله


الى هي خيط وفيه حوالي 100 ميدار او 200 ميدار


انا سمعت انها عاادي


واربيعي قالي انه مره اهو وينزلونها ياتهم الشرطه وماقالولهم شي :r0o0t (66):


انا استغربت


ممكن حد يفيدنا في هالشي؟؟

[mortaz]

السلام عليكم ورحمة الله وبركاته

حبيبي سؤالك عن مسموح او لا او كيف الطريقة

سلامي

[مرفاوي69]

حبيبي هي غير مسموح بها وغرامتها 20الف

واذا كنت تبغيها حق هوامير وبتنزلها عند قصاصير فانا افضل كل خيه خمس او سبع ميادير

واذا حق شعري نزل 50 او 100 في مكان يكون القاع رمل
وهذا والله اعلم

[شيروكي 2009]

لايضحك عليك؟؟؟ ممنوووووووع واذا مسكتك الدوريه راح يسوولك قضيه وممكن ينشطب قاربك فدير بالك ولاتفر منشله ولا غيره وبالتوفيق

[يتيم الحب]

مشكورين اخواني



بس انا مستغرب انه شي واحد منزل وياته الدورية وماقالوله شي


ونفسه هالشخص نزل منشله يراير وزخوه الشرطة


قالوله انها خطيره وهذي اول مره وآآخر مره

بس انا ابيها للشعاري والهوامير والسكل ( السجل ) والكوفر او الكوفر ام صنام

وانا من الساحل الشرقي من بوظبي

[سلمان1]

الغالي يتيم الحب الحب بخصوص المنشلة هذه ممنوعة غريبة الشرطة ما قالوا شي عندنا بالشارجة ممنوع ويمكن يسحبون القول منك وغرامة ومخالفة ...الله المستعان.... وبعدبن المنشلة خطرة وحاسب منها يا الغالي ...ربي يوفقك

[السيف]

السلام عليكم ورحمة الله وبركاته

ما شاء الشباب ما قصور وياك . بس حبيت اضيف شي بسيط. إذا كنت تقصد منشلة القاع فهي فعلا ممنوعة وفيها غرامات و إجراآت قانونية الله لا يراويك. وفي منشلة الكنعد هذة عادي مش ممنوعة وفيها بويات تطفو و لكن محدد لك 50 ميدار فقط. ومثل ما قال النوخذة بو عزوز ميادير المنشله خطره هذا وإن شاء الله اكون افدتك

[يتيم الحب]

اها

انا من امارة الشارجه من خورفكان

بس ماعليك اذا المنشله خطيرة

تراه انا اخطر منها هع


&&&&&&&&&&&&&&


اخوي

كيف منشله الكنعد؟؟

اا ضرب فيها 50 كنعد منو بيرفعها خخخ فالونش

[خباط310]

العلب بعيييد يا حبيبي



فيها مشاكل وغرامه وبلاوي



خلك بعيد

[السيف]

اها

انا من امارة الشارجه من خورفكان

بس ماعليك اذا المنشله خطيرة

تراه انا اخطر منها هع


&&&&&&&&&&&&&&


اخوي

كيف منشله الكنعد؟؟

اا ضرب فيها 50 كنعد منو بيرفعها خخخ فالونش


ههههههههه 50 كنعد مره وحده الله يرزقك و الجميع إن شاء الله

منشلة الكنعد يا الحبيب هي عباره عن خيط 90 طالع منه خيط 80 حق ترديعة الميدار. و كل ميدار لازم مربوط بمدور و مردع بمسيم. وتقريبا فوق كل ميدار بويه مربوطه بحبل بطريقه راسيه و مربوطه بخيط الـ 90 .يعني لو عندك 50 ميدار بيكون عندك 50 بويه. و لازم تنحط بكل ميدار سمكة حيه. و عقب ما تمد المنشله اتم تتريا و دور حولها اول ما تضرب السمكه اتشوف البويه توقف او تغط على حسب حجم السمكه. صح هي اسمها منشلة الكنعد بس يضرب عليها الجد و الحاقول و الضلوع و العنفلوص و اسماك اخرى. و المنشلة هذي مش ممنوعة. الممنوعة ((((((((منشلة القاع)))))))). و الشغلة هذه يا الحبيب شغلة اهنود يعني يبالك عاملين على الأقل.

ارجع وقولك ان المنشله خطره بالذات أنت و تمد و لا تطوي هيلا مرحلتين حرجات شوي. تخيل انت وتشك الميدار بالسمكه الطعم يضرب يريور و لا سمكة عوده بالميدار اللي تايحنه قبل و يجيسك الميدار لاسمح الله شو بتسوي بهذه الحاله. الله يبعد عنك الشر و عن الجميع إن شاء الله

اتمنى اكون افدت و لو في اي استفسار انا حاضر

[أسماك الامارات]

المنشلة خطير ويباله واحد فاهم ويعرف الطريقة وبالذات وقت الرمي والسحب لازم الصياد وربعه يكونوا حريصين.

وشيء ثاني المنشله في أبوظبي ممنوعه منعا باتا إلا إذا دبرت نفسك
بومحمد

[غواص الجير]

الغالي اول شي السلام عليك ثاني شي منشلة الكنعد عدنا في راس الخيمه مسموح بها حتي لو 200 ميدار ولو تبغي وحده انا حاضر وبخبرك الطريقه بس الصراحه صيدها عجيييييييييييب

[يتيم الحب]

اوكي اخوي السيف


مشكووووور



اممم

ماعليك لاتحاتي


انا اعجبك فالشل


مره ابي ارفع سمكه

صار لي ساعه وانا ارفع فيها خخخ بس للأسف عطيت العامل يكمل لأني هورت وشدت عضلاتي


والحين انا ياي امسك الخيط اكمل عليها

والا اجوف العامل قاص الخيط


هذي الساعه انا ميت من القهر