الهامور

[أذكر ربك]

شو السالفه يقولون ممنوع صيد الهامور وانا بروحي سألت الدلال اللي في المزاد وقالي المنع بيبدأ من ول شهر 6 شو السالفه الي عنده فكره يخبرنا ماعليكم أمر

[بو يزن]

السلام عليكم اخوي

بالنسبة للهامور مانعينه مؤقتا لانه وصل لقبل مرحلة الخطر من الفقدان
خصوصا انه في بحاريين بيصيدون الهامور الصغير

هالفترة مجرد فرصة للتكاثر فقط للوصول للمعدل المناسب

يعني موب انه ممنوع نهائيا

وطبعا الهامور اللي بتحصله بسوق السمك كله احجام كبيرة ( فقط )

وللصيادين اللي عندهم رخصة صيد تجارية
ونفس السالفة بالنسبة ( للبدح )

والله يوفقك ويحفظك ويحفظ الجميع

[abuhussain79]

والله انا سمعت الخبر, لكن ما عرفت التفاصيل.

الله يستر

[الياه]

السلام عليكم ورحمة الله وبركاته,,,,,,,,

الجماعه بيمنعونه لأنهم شافو ف سوق من فتره حول 3 شهور تقريباً السوق متروس هوامير على طول قامو وصدرو المنع خوفاً على الهامور .
يا جماعه لكل سمجه موسم وكان موسم الهامور يوم شافوه ب سوق ودليل مثلً روح سوق بوظبي للسمج وبشوف سمج الجفدار متروس وبكثره , طيب ليش الجواب سهل لأنه موسم الجفدار حيث يأتي لرمي الحبل وينصاد فالدوابي ( القراقير لكبيره الجديده ) .

نرجع حق صلب الموظوع كما تعلمون يا اخواني طول السنه عنا موجود شي ينقاله ( الدر ) الدر هو عباره عن وقت معين تزيد فيه السمج وتنقص في انواع آخرى من السمج كما يتعلق معه نوع ظربة الهوء مثلً ظربة الشوله , النعايم , لبطين , الثريا .

وفي ظربة لبطين او البلده ( الثريا ) يثور الهامور من الغزير ويدش فالقراقير ويزيد بطريقه مو طبيعيه , ودليل اكثر اللي جابو الهامور هم اصحاب القراقير وقليل من اهل الحداق . وبعد زوال الموسم يقل ولا يدش بالقراقير وينصاد بالحداق اكثر .

خلاصة الموظوع الهامور حاله حال اي سمجه لها موس ويزول ويتجدد بعد فتره محدده له .

وسمحولي اذا قصرت في شي والنسيان

[بابا دريا]

وانا بصراحة مع منع الصيد لأن في ناس ياكلون الخضر واليابس

[barracuda]

كم شهر المنع ؟